LIKISÁ, 8 Agostu 2025 – Sua Exelénsia Ministru Juventude, Desportu, Arte no Kultura (MJDAK), Nélyo Isaac Sarmento, ohin partisipa iha serimónia abertura Kopa Futsal Mau Caro Cup. Eventu ne'e lansa ofisiálmente husi Sua Exelénsia Primeiru Ministru (PM), Kay Rala Xanana Gusmão, iha Kampu Futsal Leopa, Munisípiu Likisá.

Apelu ba Karakter no Harmonia

Iha ninia lia-menon, PM Xanana Gusmão hato'o parabéns ba Juventude Tane Desportu (JTD) ba inisiativa ne'e. PM Xanana mós apela ba juventude sira atu uza desportu hodi:

"Hadia karakter, hametin harmonia no hadomi malu. Rai ida ne’e iha liman ita, entaun tenke dezenvolve iha dalan di'ak, labele lori ba odíu."

Mensajen husi Xefe Governu ne'e subliña importánsia husi papél desportu nian nu'udar meiu ba dezenvolvimentu sosiál no prevensaun ba konflitu.

Susesu Organizasionál Joven nian

Kopa Mau Caro ne'e nu'udar inisiativa husi grupu Juventude Tane Desportu (JTD), ho apoiu espesiál husi Prezidente Konseilu Veteranus Munisípiu Likisá, Vicente da Conceição "Rai Los".

Torneiu ne'e envolve klube hamutuk 60, kompostu husi kategoria mane 50 no feto 10, ne'ebé mai husi Postu Administrativu sira hanesan Bazartete, Likisá, Maubara, no Loes.

MJDAK komprometidu atu kontinua apoia inisiativa desportiva sira-ne'ebé mai husi baze (lokál) hodi promove partisipasaun joven sira-nian, no hasa'e kualidade desportu iha rai-laran.

#MídiaMJDAK