DILI, 24 Marsu 2026 (Mídia MJDAK) – Sua Excelência Ministru Juventude, Desportu, Arte no Kultura (MJDAK), Nelyo Isaac Sarmento, ohin lidera reuniaun kordenasaun ho liñas ministeriál sira ne’ebé integra iha Konseilu Nasionál Dezenvolvimentu Juventude (KNDJ), hodi diskute sinkronizasaun programa no dadus foku ba foinsa’e sira iha rai-laran.

Sorumutu ne’ebé hala’o iha Salaun MJDAK ne’e, mós nu’udar pasu estratéjiku ida hodi kumpri mandatu Dekretu-Lei ne’ebé fó knaar ba MJDAK nu’udar lider ba konsellu ida-ne’e. KNDJ rasik kompostu husi reprezentante sira husi instituisaun oioin, hanesan Ministériu Saúde (MS), MAPFF, SECCOP, SEAK, MESCC, MI, no ADTL.

Iha sesaun entrevista, Ministru Nelyo Isaac Sarmento subliña katak objetivu prinsipál husi reuniaun ne’e mak atu komisáriu sira husi kada liña ministeriál bele fahe informasaun kona-ba sira-nia promosaun no programa espesífiku ba joven sira.

“Ita hakarak evita duplikasaun projetu no orsamentu ba asuntu juventude nian. Ha’u kontente tebes tanba kada liña ministeriál mai ho hanoin no programa ne’ebé konkretu ba foinsa’e sira. Ida-ne’e permite ita atu iha dadus ne’ebé kompleta,” esklarese Sua Excelência Ministru.

Alende ne’e, Ministru mós salienta katak integrasaun dadus ne’e importante tebes ba pozisaun Timor-Leste iha rejionál ASEAN. Ho dadus ne’ebé kompleta kona-ba formasaun, apoiu ba grupu foinsa’e, ka indivídu sira, Governu bele hatudu evidénsia klaru kona-ba investimentu ba dezenvolvimentu rekursu umanu foinsa’e nian.

KNDJ funsiona nu’udar órgaun konsultativu ne’ebé iha knaar hodi identifika problema no nesesidade urjente ne’ebé foinsa’e sira hasoru, nune’e Governu bele foti dezafiu sira-ne’e hodi transforma ba polítika públika ne’ebé efektivu.

#MídiaMJDAK