DILI, 19 Setembru 2025 – Ministériu Juventude, Desportu, Arte no Kultura (MJDAK), liuhosi Diretór-Jerál Juventude, David Tomás de Deus, asina ona akordu formál kona-ba Fundu Inisiál ho reprezentante sira husi asosiasaun juventude na'in-sanulu-tolu (13) ne'ebé mai husi munisípiu Dili, Ermera, no Bobonaro.

Serimónia asina akordu ne'e hala'o iha loron 17 Setembru 2025, iha Salaun João Paulo II, Comoro. Akordu ne'e marka lansamentu ofisiál fundu ne'ebé hetan apoiu husi UNICEF no supervizaun téknika husi MJDAK.

Akordu ne'e asina hosi Diretór-Jerál Juventude (MJDAK), Diretora Ezekutiva ONG Ba Futuru, Judith Maria de Sousa, no reprezentante husi asosiasaun juventude sira.

Asosiasaun Juventude 13 Hetan Rejistu Legál

Liuhosi inisiativa ne'e, ONG Ba Futuru, ho supervizaun husi MJDAK no apoiu husi UNICEF, kolabora ho grupu foin-sa'e na'in-sanulu-lima (15) hodi dezenvolve sira-nia ideia no fasilita prosesu rejistu legál iha Ministériu Justisa.

Husi grupu hirak ne'e, grupu 13 konsege kompleta ho susesu prosesu rejistu no agora sai ona asosiasaun ne'ebé legalmente rekoñesidu no prontu atu hetan finansiamentu.

Transparénsia no Akontabilidade Fundu nian

Iha ninia diskursu, Diretór-Jerál David Tomás de Deus subliña importánsia husi transparénsia no akontabilidade iha jestaun Fundu Inisiál ne'e.

Jestaun no supervizaun ba fundu ne'e sei hala'o husi funsionáriu MJDAK sira ne'ebé bazea iha Sentru Juventude Munisípiu Dili, Ermera, no Bobonaro.

"Prátika jestaun finanseira ne'ebé responsavel mak esensiál atu mantein konfiansa husi parseiru dezenvolvimentu sira. Ha'u enkorajá asosiasaun sira atu mantein dokumentu ne'ebé loos no kompletuhodi bele hetan apoiu finansiamentu husi MJDAK iha futuru," nia afirma.

Diretór-Jerál konklui katak ho asosiasaun foun hirak ne'e, kada munisípiu agora iha ona grupu foin-sa'e ne'ebé iha kapasidade atu kolabora no kontribui ba dezenvolvimentu nasionál, hodi promove povu Timor-Leste nia moris di'ak.

#MídiaMJDAK