DILI, 17 Abríl 2026 (GCI/SEAK) – Sua Exelénsia Sekretáriu Estadu Arte no Kultura (SEAK), Jorge Soares Cristóvão, hala’o enkontru kortejia ho Konselleira no Adjunta Xefe Misaun Embaixada Japaun iha Timor-Leste, Ms. Sakai Yuki, iha Gabinete SEAK, Dili, sesta-feira ne’e.

Sorumutu ne’e  hodi diskute parseria estratéjika no hametin koperasaun bilaterál ne’ebé eziste ona entre Governu Timor-Leste no Governu Japaun, liuliu iha faze dezenvolvimentu arte no preservasaun kultura nian.

Kolaborasaun Kulturál

Iha enkontru ne’e, parte rua troka hanoin kona-ba oinsá bele kria programa hamutuk ne’ebé bele fó benefísiu ba artista no kriadór kulturál sira iha rai-laran. Japaun, nu’udar nasaun ne’ebé iha koñesimentu aas iha indústria kreativa no konservasaun patrimóniu, sai parseiru xave ba SEAK hodi haburas liután setór ne’e.

Sekretáriu Estadu, Jorge Soares Cristóvão, apresia tebes ho disponibilidade Governu Japaun nian hodi kontinua apoia Timor-Leste. "Enkontru ne'e importante tebes hodi kria serie kolaborasaun foun, liuliu oinsá ita bele aprende husi esperiénsia Japaun nian hodi foti ita-nia arte no kultura ba oin," dehan Governante ne'e.

Preservasaun Identidade

Ms. Sakai Yuki mós hatudu kompromisu Embaixada Japaun nian hodi servisu hamutuk ho SEAK iha futuru, liuhusi interkámbiu kulturál no programa kapasitasaun sira ne’ebé bele hametin identidade nasionál Timor-Leste nian.

Sorumutu ne’e termina ho sentimentu optimizmu husi parte rua hodi konkretiza planu serbisu sira ne’ebé diskute ona iha tempu badak.