DILI, 01 JUÑU 2026 – Ministériu Juventude, Desportu, Arte no Kultura (MJDAK), liuhusi Direção Geral Servisu Korporativu, realiza reuniaun konsellu diretores sira hotu iha Salaun Magna MJDAK, Lecidere, Dili. Reuniaun ne'e hala'o ho objetivu atu avalia rezultadu servisu no ezekusaun orsamentu ba trimestre dahuluk (Q1) no trimestre daruak (Q2) tinan 2026.

Iha reuniaun ne'e, Direção Nacional Administrasaun no Finansas (DNAF) no Direção Nacional Planu no Institusionál (DNPCI) aprezenta rezultadu servisu ba kada diresaun nian. Orsamentu ne'ebé Ministériu Finansas aloka ba MJDAK-SEAK ho total $11 miloens, ho nune'e reuniaun ne'e mós atu hatene pozisaun orsamentál atual no prepara proposta ba Orsamentu Jerál Estadu (OJE) 2027, karik MJDAK husu aumento.

Tuir aprezentasaun husi DNAF, MJDAK-SEAK foin atinji persentajen 29% husi total orsamentu $11 miloens nian. Tanba ne'e, DNAF husu ba parte diresaun hotu atu ezekuta hotu orsamentu ne'ebé aloka ona, molok tama ba Q3 tinan 2026.

Husi rezultadu servisu ne'ebé aprezenta husi DNPCI, katak kada diresaun iha MJDAK-SEAK hatudu progresu diak iha ezekusaun orsamentu, tuir alokasaun ne'ebé DNAF fó ba kada diresaun sira.

Reuniaun ne'e partisipa direitamente husi Xefi Gabinete MJDAK, Diretor Geral Servisu Korporativu, Diretor Geral Juventude, Diretor Geral Arte no Kultura, inklui Diretor Nasional Juventude, Diretora Desportu Federadu, UIA, Kordenadora Gabinete Komunikasaun no Informasaun (GCI), no Asesór sira.

MJDAK reafirma kompromisu atu garante ezekusaun orsamentu ne'ebé efisiente no efetivu, hodi suporta implementasaun programa sira ne'ebé fó benefísiu ba juventude, desportu, arte no kultura iha Timor-Leste.

#MediaMjdak