BALIBO, 26 abril 2026 – Membru Parlamentu Foinsae Nian (PFN) hala’o estudu vizita durante loron tolu, husi 24 to’o 26 de abril, iha Suku Leo-hitu, Postu Administrativu Balibo, Munisípiu Bobonaro. Atividade ne’e ho objetivu atu hakbesik-an ba autoridade lokál no komunidade, hodi analiza kle’an problema sosiál ne’ebé foinsae sira enfrenta iha área fronteira.

Iha estudu vizita ne’e, membru PFN sira rekolla dadus bazeia ba Polítika Nasionál Juventude (PNJ) ne’ebé foka ba área prinsipál lima: edukasaun, saúde, empregu no empregabilidade, violénsia no krimi, no partisipasaun sívika.

Reprezentante Ministériu Juventude, Desportu, Arte no Kultura (MJDAK), Martinho de Araujo da Costa , subliña katak Parlamentu Foinsae nu’udar programa prioritáriu governu nian. Rezolusaun governu nian ne’ebé altera ona ba dala tolu ne’e, fó espasu ba foinsae sira ho idade 12 to’o 17 atu aprende kona-ba lideransa, análize sosiál, no jestaun organizasionál.

“Ita rekolla dadus bazeia ba faktus reál hodi aprezenta ba parte relevante sira, atu bele foti desizaun nu’udar servidor estadu. Ita nafatin dedika ita-nia an ba foinsae sira hodi prepara futuru ne’ebé di’ak liu,” dehan Martinho de Araujo.

Iha fatin hanesan, Xefi Suku Leo-hitu, Santina da Silva, agradese ba MJDAK no Parlamentu Foinsae tanba lori membru PFN sira mai hodi rona direitamente preokupasaun komunidade nian.

“Joventude iha Suku Leo-hitu iha vontade boot atu aprende, maibé falta fasilidade formasaun. Ami husu atu kria sentru formasaun ba lian Portugés, Inglés, no Koreanu, hodi hasa’e konesimentu no abilidade foinsae sira-nian atu kompete iha nível munisipál no nasionál,” Santina rekomenda.

Membru PFN sira mós sente orgullu ho oportunidade ne’e. Leandro Castro Lemos, nu’udar membru PFN, afirma katak vizita ne’e permite membru sira atu kaptura situasaun real iha kampu. Nune’e mós Selfiana Salus, membru PFN seluk, ne’ebé konsidera vizita ne’e nu’udar esperiénsia importante hodi observa direitamente dezafiu sosiál hanesan kondisaun infraestrutura, limitasaun ekonómika, no kazu kaben sedu iha komunidade.

Atividade ne’e hetan partisipasaun husi membru PFN hamutuk 35 (feto 14 no mane 21), hamutuk ho autoridade lokál, diretór eskola, no xefi joventude sira iha área ne’ebá. Estudu vizita ne’e sei hala’o mós iha munisípiu sira seluk hanesan RAEOA no Covalima.