AILEU, 12 Maiu 2026 (GCI-MJDAK) — Sentru Juventude Munisípiu Aileu (SJMA) konsege atinje ona meta signifikativu iha dezenvolvimentu kapasidade foin-sa’e nian, maske foin mak tama ba  trimestre daruak (Q2) tinan 2026. Liuhusi parseria estratéjiku ho Ministériu Juventude, Desportu, Arte no Kultura (MJDAK), sentru ne’e hatudu efikásia iha jestaun fundu operasionál hodi fó benefísiu direta ba foin-sa’e hamutuk 229 iha área formasaun oioin.

Jestór SJMA, Sr. José Valente Borges da Costa, hatete katak progresu ne’ebé iha ultrapasa ona tarjetu inisiál ne’ebé temi iha Terms of Reference (ToR). Atinjimentu ne’e sai nu’udar evidénsia ba susesu koperasaun entre Governu sentrál no sentru juventude iha baze hodi prepara rekursu umanu ne’ebé kualifikadu.

Atinjimentu SJMA nian foku ba kria impaktu fíziku no kbiit intelektuál foin-sa’e sira nian, ne’ebé fahe ba pontu tolu:

Susesu Formasaun Téknika: Konsege kobre ona foin-sa’e na'in 229 ne'ebé tuir formasaun lian estranjeira (Inglés, Japaun, Koreia), komputadór, no edukasaun sívika. Númeru ne’e hatudu tendénsia katak iha fin do anu, SJMA bele liu fali tarjetu foun ema na'in 250 ne'ebé MJDAK fó.

Sustentabilidade liuhusi "Maksimizasaun": SJMA implementa ona sistema "Maksimizasaun" ne’ebé kapasita voluntáriu sira hodi kria proposta, karta ofisiál, no relatóriu rasik. Inisiativa ne’e garante katak sentru ne’e iha rejiliénsia no kbiit administrativu ne’ebé forte ba tempu naruk.

Espansaun Rede no Inkluzividade: SJMA la’ós de’it foku ba formasaun klase laran, maibé mós fasilita dormitóriu ba estudante husi família kbiit-laek no kria koperasaun ho Friends of Aileu ba bolsa estudu nível universidade, ne’ebé konsege ona prodús graduadu hamutuk na'in 100.

"Atinjimentu sira-ne'e hatudu katak joventude Aileu la'ós de'it hein, maibé sai solusaun ba dezafiu governu nian," subliña Sr. José Valente Borges da Costa.

Impaktu husi programa SJMA nian kobre ona aspetu ekonómiku, iha ne’ebé grupu feto sira ne’ebé hetan formasaun suku hena konsege ona lori sira-nia produtu ba merkadu nasionál no internasionál, inklui Austrália.

Ba oin, ho apoiu fundu hamutuk $35.000 husi Gabinete Asuntu Sosiedade Sivíl, SJMA sei estende tan sira-nia atinjimentu liuhusi kampaña prevensaun konflitu iha munisípiu laran tomak. Esforsu ida-ne’e reafirma pozisaun SJMA nian nu’udar parseiru permanente MJDAK nian ne’ebé efektivu hodi dezenvolve potensiál foin-sa’e iha nível lokál.