DILI, 08 ABRIL 2026 – Ministériu Juventude, Desportu, Arte no Kultura (MJDAK), liuhusi Gabinete Inspesaun Jerál (GIA) no Diretór Nasionál Administrasaun no Rekursu Umanu (DNARH), servisu hamutuk ho Institutu Nasionál Seguransa Sosiál (INSS), realiza sosializasaun kona-ba Modulu Kontribuisaun liuhusi plataforma online ba kargu xefia, asesór, no funsionáriu sira iha MJDAK.

Atividade ne’e loke ofisialmente husi Inspetór Jerál MJDAK, João dos Santos , ne’ebé akompaña husi Diretór DNARH, Florindo Napoleão Xavier, no Xefe Gabinete INSS, Zeca Friado Afoli Coa. Objetivu prinsipál husi sosializasaun ne’e mak atu habelar koñesimentu kona-ba dijitalizasaun sistema kontribuisaun seguransa sosiál nian.

Dijitalizasaun ba Transparénsia no Futuru Funsionáriu nian

Inspetór João dos Santos, iha ninia intervensaun, emfatiza katak implementasaun sistema online ne’e hanesan pasu importante ida hodi tuir modernizasaun administrasaun públika ne’ebé Governu promove.

"Tuir Rezolusaun Governu nian, importante tebes ba funsionáriu hotu atu komprende oinsá modulu kontribuisaun foun ne’e funsiona. Ho sistema dijitál ne’e, funsionáriu sira bele kontrola ho fasil sira-nia kontribuisaun 4% ne’ebé ko’a fulan-fulan, hodi asegura katak iha tempu reforma sira bele asesu ba sira-nia direitu ho fásil no transparente," dehan Inspetór João.

Nia mós dehan tan katak kontribuisaun ba seguransa sosiál la’ós de’it obrigasaun legál, maibé hanesan garantia ba sustentabilidade moris nian iha tempu reforma.

Modernizasaun Servisu husi INSS

Iha fatin hanesan, Xefe Gabinete INSS husi Ministériu Solidariedade Sosiál no Inkluzaun (MSSI), Zeca Friado Afoli Coa, esplika katak plataforma online ne’e dezenvolve hodi fasilita monitorizasaun ba "kareira kontribuisaun" funsionáriu ida-idak nian.

Liuhusi sistema ne’e, prosesu informasaun sai lalais liu, seguru, no hamenus burokrasia ne’ebé naruk. Sosializasaun ne’e mós sai hanesan espasu ida ba funsionáriu sira iha MJDAK atu husu kestaun tékniku sira relasiona ho sira-nia dadus kontribuisaun nian.

Partisipa iha atividade ne’e mak kargu xefia sira, dirijente, asesór, no mós funsionáriu administrativu sira husi unidade oioin iha MJDAK.

#MídiaMJDAK