COVALIMA, 19 Setembru 2025 — Ministériu Juventude, Desportu, Arte no Kultura (MJDAK), liuhosi Diresaun Nasionál Dezenvolvimentu Juventude (DNDJ), kolabora ho Sentru Juventude Covalima (SJC), hodi realiza formasaun edukasaun relasaun saudavel durante loron lima (15-19 Setembru). Formasaun ne'e, ne'ebé hetan apoiu husi UNFPA, hala'o iha Suku Lalawa, Postu Administrativu Tilomar, ho objetivu atu kapasita joven feto no mane 31 kona-ba saúde reprodutiva, atu prevene kazamentu sedu, moras seksuál, no violénsia doméstika.

Serimónia loke ofisiálmente husi Administradór Postu, no ensera husi Xefe Suku Lalawa, Zeferino Jesus de Richman.

Joven Nu'udar Futuru Nasaun nian

Iha ninia intervensaun ba enseramentu, Diretór Nasionál, Firmino Dias Quintas Soares, hateten katak joven sira mak maioria iha Timor-Leste, ho pursentu 72 husi populasaun iha idade entre 15 to'o 35.

Nia subliña katak formasaun kona-ba relasaun saudavel ne'e importante tebes atu muda joven sira-nia moris, hahalok, no futuru. Nia apela ba joven sira atu evita risku sira hanesan kazamentu sedu, isin-rua sedu, moras HIV/SIDA, no uza droga.

"Joven sira mak futuru ba nasaun," dehan Firmino. "Prepara imi-nia an fízikamente, mentalmente, no sosiálmente atu lori Timor-Leste ba dezenvolvimentu no prosperidade."

Orgulhu Komunidade nian

Jestór Sentru Juventude Covalima, Júlio Ferreira, hatudu sentimentu orgullu ba joven sira husi Tilomar ne'ebé antuziáztiku tebes atu tuir formasaun ne'e, hodi buka matenek ne'ebé kredivel ba sira-nia futuru. Nia husu ba sira atu kontinua aprende kona-ba lala'ok joven nian.

Xefe Suku Lalawa, Zeferino Jesus de Richman, agradese tebes ba MJDAC ne'ebé bele hakat ba sira-nia suku. Nia subliña katak formasaun ne'e importante tebes no husu atu labele para de'it iha ne'e, maibé bele kontinua ba área sira ne'ebé kazu as ba problema sosiál sira.

Partisipante ida, Neziah de Araujo, hato'o ninia kontente hodi tuir formasaun ne'e no promete sei fahe esperiénsia foun ne'e ba ninia kolega sira ne'ebé la partisipa.

Atividade ne'e taka ho entrega sertifikadu ba partisipante 31. Serimónia enseramentu ne'e partisipa mós hosi Xefe Suku Lalawa, Xefe Aldeia Lalawa, Xefe Juventude Aldeia, no joven voluntáriu sira.

#MidiaMJDAK