ORGULLU NASIONÁL: Voleiból Praia Mista TLS Konkista Medalla Prata iha Jogu CPLP

DILI, 24 Jullu 2025 – Timor-Leste hatudu ninia prestasaun di'ak tebes iha kompetisaun internasionál hodi konsege konkista Medalla Prata ba modalidade Voleiból Praia Mista iha eventu XII Jogos Desportivos da Comunidade dos Países de Língua Portuguesa (CPLP) 2025.

Susesu boot ne’e reflete esforsu no dedikasaun másimu husi atleta timoroan sira iha Kampu Laran, Lecidere.

Ekipa Voleiból Praia Mista Timor-Leste nian hakat ba jogu finál hasoru adversáriu forte, Portugal. Jogu ne'e hala'o ho intensa no hatudu duni espíritu luta ne'ebé la rende husi atleta sira.

Maski Portugal manán jogu finál ne'e ho skor set 2-0, performa no dedikasaun husi ekipa Timor-Leste merese duni elojiu boot.

Momentu desafiu ida mak bainhira jogadór ho númeru 1, Noel Sequeira, hetan kanek uitoan iha set segundu, maibé nia kontinua joga ho korajen no determinasaun, hodi fó inspirasaun ba nia parseiru sira.

Konkista Medalla Prata ne'e hanesan susesu boot ida ba Timor-Leste iha Jogos CPLP 2025 no hatudu katak atleta timoroan sira iha kapasidade atu kompete ho nasaun sira seluk iha nivel internasionál.

#MídiaMJDAK