Bali, Indonézia, 04  Maio  2026 (GCI/MJDAK) - Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, partisipa Southeast Asia Ministerial Meeting on Youth and Sports 2026, ne'ebé hala'o iha Hotel The Meru, Bali, Indonézia, iha loron 03 to'o 05 de Maio de 2026.

Ho tema "Strengthening SEA Youth Collaboration and Sports Diplomacy for a Resilient Future", forum nível ministeriál ne'e sai fatin estratéjiku ba líderes Sudeste Ázia hodi hametin kooperasaun rejionál iha setór juventude no desportu, no esplora dalan ba futuru ne'ebé reziliente no inkluzivu.

Diskusaun iha reuniaun ne'e foka ba área prioritáriu tolu. Primeiru, Kolaborasaun Joven — reforsa papel foin-sa'e hanesan líderes ne'ebé sei determina futuru rejiaun nian. Segundu, Diplomasia Desportu — rekoñese desportu hanesan instrumentu efetivu hodi hametin relasaun no harmonia entre nasaun sira iha Sudeste Ázia. Terseru, Dezenvolvimentu Talentu — diskute mekanizmu ba dezenvolvimentu talentu desportivu no parseria globál ne'ebé sustentável.

Iha forum ne'e, Timor-Leste reafirma nia kompromisu hodi servisu hamutuk ho nasaun viziñu sira — hodi dezenvolve kapasidade foin-sa'e no hametin setór desportu nasionál ba kompetisaun iha nível rejionál.

Hamutuk ita dudu potensiál juventude no desportu Timor-Leste ba oin!