BAUCAU, 18 Abríl 2026 (GCI/MJDAK) – Sekretaria Estadu Arte no Kultura (SEAK), liuhusi Departamentu Istória no Valór Kulturais, hala’o semináriu loron ida hodi komemora Loron Fundasaun Baucau ba dala 167. Atividade ne’ebé hala’o iha Salaun Apuramentu Vila Nova, Baucau, Sabadu ne’e,  ho objetivu hodi refleta fali istória no hametin identidade kulturál iha jerasaun foun sira-nia le’et.

Ho tema nasionál "O Nosso Orgulho, A Nossa Casa" (Ita-nia Orgullu, Ita-nia Uma), semináriu ne’e sai nu’udar faze importante ida hodi prepara ba selebrasaun boot Loron Fundasaun Baucau nian ne’ebé sei monu iha loron 20 Abríl oin mai.

Tais nu’udar Identidade no Patrimóniu Mundiál

Xefe Departamentu Istória no Valór Kulturais, Carlos de Jesus Freitas, ne’ebé sai nu’udar oradór prinsipál, subliña katak selebrasaun tinan ne’e nian nudar reflesaun nian ba buat ne’ebé bei-ala sira husik hela.

"Ita selebra loron Baucau ba dala 167 hodi refleta ba kotuk. Imi nu’udar jerasaun foun tenke orgullu ba ita-nia 'uma' rasik, ne’ebé signifika tenke hatudu no proteje ita-nia identidade. Ha’u foku liu ba Tais, tanba iha loron 21 Dezembru 2021, UNESCO rekoñese ona Tais Timor nu’udar Patrimóniu Mundiál ne’ebé presiza salvaguarda urjente," dehan Carlos de Jesus Freitas.

Alende Tais, oradór ne’e mós kobre aspetu sira  seluk husi patrimóniu imateriál hanesan dansa, múzika, uma lulik, no pasajen kulturál sira ne’ebé sai rikusoin ba Munisípiu Baucau no Timor-Leste tomak.

Inisiativa Governu ba Uza Tais iha Eskola

Iha biban ne’e, SEAK mós informa katak Governu hala’o hela tentativa no kordenasaun hodi kria regulamentu ida ne’ebé bele enkoraza estudante no funsionáriu públiku sira hodi utiliza roupa ho motivu Tais iha semana ida nia laran. Inisiativa ne’e hodi asegura katak Tais la’ós de’it sai sasán muzeu nian, maibé moris nafatin iha prátika loroloron nian nu’udar patrimóniu umanidade.

Partisipasaun Inkluzivu

Semináriu ne’e ofisialmente aberta husi Sekretária Asuntu Sosiál Munisípiu Baucau, Maria Celestina Viegas. Atividade ne’e hetan partisipasaun másimu husi estudante na’in 120 ne’ebé reprezenta Ensinu Báziku, Sekundáriu, Tékniku Vokasionál, no Universitáriu sira iha Baucau Vila.

Marka prezensa mós iha semináriu ne’e, diretór eskola sira, profesór, diretór munisipál, xefe departamentu, no xefe delegasaun territoriál sira husi munisípiu laran.