DÍLI, 31 MARSU 2026 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, hamutuk ho Ministru Interior (MI), Sua Exelénsia Francisco da Costa Guterres, partisipa iha Sesaun Plenária Ordinária iha Parlamentu Nasionál hodi aprezenta no diskute Proposta Lei (PPL) foun ba Rejime Jurídiku Prátika Arte Marsiais.

Iha sesaun ne’e, Deputadu sira iha Uma Fukun aprova ona Proposta Lei Nu. 24/VI (3.ª) iha jeneralidade ho rezultadu votasaun: 38 a favor, 0 kontra, no 16 abstensaun.

Hafoin aprovasaun iha jeneralidade, Plenária mós deside ho votus 39 a favor, 3 kontra, no 2 abstensaun hodi hatun fali proposta lei ne’e ba Komisaun G (asuntu Edukasaun, Juventude, Kultura no Desportu) hodi hala’o diskusaun iha espesialidade, ho apoiu husi Komisaun A no Komisaun B.

Sesaun importante ne’e prezide husi Prezidente Parlamentu Nasionál, Sra. Maria Fernanda Lay, ne’ebé akompaña husi membru Meza. Marka mós prezensa iha debate ne’e, Vise-Ministru Asuntu Parlamentár, Sua Exelénsia Adérito Hugo da Costa, no Prezidente Komisaun Reguladora Arte Marsiais (KRAM), Sr. Octávio da Conceição.

Proposta Lei ne’e nu'udar pasu estratéjiku Governu nian hodi kria enkuadramentu legál ne’ebé forte ba prátika arte marsiais iha Timor-Leste, hodi asegura katak atividade sira ne’e la’o tuir orden públika no dezenvolvimentu desportivu ne’ebé saudavel.

#MídiaMJDAK