DÍLI,27 Abril 2026 – Iha ámbitu Prezidénsia Timor-Leste iha Komunidade dos Países de Língua Portuguesa (CPLP), Ministériu Juventude, Desportu, Arte no Kultura (MJDAK) kontinua hametin koordenasaun hodi asegura susesu organizasaun ba XIV Reuniaun Ministru Kultura CPLP nian, ne’ebé sei realiza iha Ministériu Negósiu Estranjeiru no Kooperasaun (MNEC), Díli.

Segunda-feira, Sekretáriu Estadu Arte no Kultura (SEAK), Sua Exelénsia Jorge Soares Cristóvão, lidera reuniaun fiksa-detallu hodi finaliza preparasaun téknika no lojístika ba eventu ne’ebé sei hala’o iha loron 4 no 5 de maio de 2026.

Reuniaun ministerial ne’e sei halibur lideransa sira husi Estadu-Membru CPLP nian hodi ko’alia kona-ba estratéjia sira atu proteje patrimóniu kulturál no promove identidade no sidadania iha espasu lusófonu.

Ajenda Eventu:

4 maio: Reuniaun Pontu Fokál – Foka ba troka esperiénsia sira, avaliasaun ba Planu Asaun, no definisaun prioridade sira ba biénio 2026-2027.

5 maio: XIV Reuniaun Ministru Kultura nian – Konsertasaun polítika no diplomátika, ne’ebé sei remata ho leitura no asinatura ba Deklarasaun Finál.

Komisaun Organizadora

Atu garante organizasaun ne’ebé efikás, Ministru Juventude, Desportu, Arte no Kultura nomeia ona ekipa koordenadora ida ne’ebé lidera husi Diretór-Jerál Arte no Kultura, Sr. Gil Paulino dos Santos Oliveira, hamutuk ho Sr. Manuel Ximenes Smith nu’udar Gestor Sekretariadu.

Governu Timor-Leste konvida públiku no koperasaun husi média sira atu akompaña prosesu ne’ebé sei kontribui ba hametin kooperasaun iha setór kulturál entre país membru sira.