COVALIMA, 09 Outubru 2025 – S.E. Ministru Administrasaun Estataál (MAE), Tomás do Rosário Cabral, reprezenta S.E. Primeiru-Ministru, Kay Rala Xanana Gusmão, no mos S.E. Ministru Juventude, Desportu, Arte no Kultura (MJDAK), Nelyo Isaac Sarmento, hodi lansa ofisiálmente Festival Kultura Fronteira ba Dala III. Festival ne’e realiza iha Kampu Futeból Ladi, Camnasa, Munisípiu Covalima.

Eventu importante ne'e nu'udar kolaborasaun entre Governu Sentrál, Autoridade Munisipál, no komunidade sira iha fronteira hodi hametin paz, estabilidade, no rekonsiliasaun liuhusi interkámbiu kulturál.

Rekonsiliasaun no Estabilidade liuhusi Kultura

Iha nia diskursu, S.E. Ministru MAE, Tomás do Rosário Cabral, hatete katak eventu ne'e hanesan kontribuisaun signifikante husi sosiedade tomak iha munisípiu Covalima, komisaun organizadora, no autoridade munisipál sira.

Ministru Cabral subliña katak antes atu lansa festival ne'e, iha dader realiza uluk ona dialogu ba rekonsiliasaun ne'ebé lidera husi amu lulik na'in-rua, Pe. Juvito Araújo no Pe. Angelo Salsinha, hamutuk ho lia-na'in sira.

"Liuhosi eventu kulturál hanesan ne'e mak lori estabilidade no Paz ba komunidade sira iha fronteira," Ministru afirma.

Nia mós hato’o parabéns ba ekipa hotu ne'ebé partisipa iha festival kulturál ne'e no agradese ba Sekretaria Estadu Arte no Kultura - Sentru Nasionál Kultura (SEAK-CNC) no autoridade lokál sira hotu ne'ebé fó fatin hodi realiza eventu ne'e.

Interkámbiu Kulturál ho NTT-Indonézia

Festival ne'e hetan partisipasaun másiva, inklui delegasaun husi Governu no komunidade sira husi Nusa Tenggara Timur (NTT), Indonézia.

Nu'udar sinale hodi hametin relasaun amizade no rekonsiliasaun, iha mós serimónia troka prenda, hanesan komunidade Covalima tara Tais ba komunidade sira husi NTT-Indonézia ne'ebé partisipa ativamente.

Ministru Cabral hato'o agradesimentu ba reprezentante Governu NTT-Kupang, husu sira atu organiza ho didi'ak hodi bele kontinua partisipa iha festival sira iha tinan oin mai.

"Ohin kalan ne’e ita hamutuk hodi kria amizade no estabilidade ba dalan rekonsiliasaun nian, tanba rekonsiliasaun ne’e mai husi ita rasik," nia konklui.

Abertura Festival ne'e hetan animasaun husi Lagatsa Kupang Band no Galaxy Band. Partisipa iha seremónia ne'e mak Vice-Ministru Obras Públikas (MOP), Sekretáriu Estadu Asuntu Veteranu no Kombatente Libertasaun Nasionál (SEATOU), Sekretáriu Estadu Dezenvolvimentu Lokál (SEDL), Komisáriu Funsaun Públika, Deputadu husi Komisaun H, Xefe Delegasaun NTT-Kupang, Bupati Kupang, inklui Madre, Padre, no komunidade Covalima tomak.

#MídiaMJDAK