PANTE MAKASAR, RAEOA, 17 JUÑU 2026 – Ministériu Juventude, Desportu, Arte no Kultura (MJDAK), liuhusi Departamentu Desportu Federadu (DDF), hala'o monitorizasaun ba programa MJDAK CUP iha Aldeia Sanane, Pante Makasar, Munisípiu RAEOA. Atividade ne'e ho objetivu atu identifika talentu foin-sa'e no prepara atleta sira ba kompetisaun iha 2ª Divizaun iha tempu tuir mai.

Programa MJDAK CUP ne'e partisipa husi total ekipa 24, ne'ebé kompostu husi ekipa mane 15 no ekipa feto 9, husi postu administrativu no suku sira iha RAEOA. Partisipasaun ne'e hatudu entusiasmu boot husi komunidade iha enklave Oecusse nian atu dezenvolve desportu voleibol.

Orsamentu USD 4.745,00 simu husi Federasaun Voleibol Timor-Leste hodi suporta atividade refere, ne'ebé uza ba organizasaun kompetisaun no apoiu ba ekipa sira.

Rekomendasaun Prinsipál husi Komunidade no Asosiasaun: Formasaun arbitrajen nível C no A ba futuru, hodi garante katak jogu sira iha rejiaun ne'e hetan arbitrajen ne'ebé kualifikadu.

Konstrusaun Ginásiu iha RAEOA (Oecusse), atu fornese fatin adekuadu ba prátika no kompetisaun voleibol iha enklave.

Realiza atividade desportiva mós iha Postu Administrativu Pasabe no Nitibe, hodi alarga partisipasaun no dezenvolvimentu desportu ba suku sira seluk.

Governu, liuliu MJDAK iha lideransa Sua Exelénsia Nelyo Isaac Sarmento, kompromete atu kontinua dezenvolve setór desportu iha territóriu tomak, inklui munisípiu enklave RAEOA, hodi anima juventude no komunidade sira, no asegura katak atividade desportiva kontinua sai meiu importante ba unidade, saúde, no dezenvolvimentu nasionál.

#MediaMjdak