DILI, 16 Abríl 2026 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ne’ebé akompaña husi Sekretáriu Estadu Arte no Kultura (SEAK), Jorge Soares Cristóvão, simu vizita kortejia husi Embaixadór Portugal iha Timor-Leste, Duarte Bué Alves, iha Salaun Magna MJDAK, Lecidere, kinta-feira ne’e.

Sorumutu ne’e ho objetivu hodi hametin relasaun bilaterál no diskute preparasaun ba eventu boot sira ne’ebé sei hala’o iha tempu badak, liuliu iha prosesu sira liga ho kultura no lian nian.

Konferénsia Ministru Kultura CPLP

Iha diskusaun ne’e, parte rua foku liu ba preparasaun Konferénsia Ministru Kultura CPLP ne’ebé sei hala’o iha loron 4 no 5 Maiu 2026. Timor-Leste, nu’udar prezidénsia CPLP, sei simu delegasaun husi nasaun membru sira, inklui Sekretáriu Estadu Kultura husi Portugal ne’ebé sei marka prezensa iha Dili.

Ministru Nelyo Isaac Sarmento subliña katak sorumutu ne’e importante tebes hodi asegura kordenasaun ne’ebé di’ak ba susesu konferénsia nian, ne’ebé sei sai abertura ba Sekuénsia atividade ministerial lubuk ida iha tinan ne’e nia laran.

Loron Mundiál Lian Portuguesa

Alende konferénsia, diskusaun ne’e mós aborda preparasaun ba Loron Mundiál Lian Portuguesa ne’ebé monu iha loron 5 Maiu. Embaixadór Duarte Bué Alves informa katak Embaixada Portugal, hamutuk ho grupu Embaixadór CPLP no MNEC, sei organiza "Semana da Língua Portuguesa" ne’ebé hahú husi loron 4 to’o 10 Maiu 2026. Programa sira-ne’e inklui: Espozisaun sobre José Saramago iha Sentru Kultura Portugués. Atividade literária no kulturál iha munisípiu sira, hanesan Manatutu. Konsertu múzika iha Fundasaun Oriente hodi maktuir semana selebrasaun nian.

Koperasaun ba Patrimóniu no Formasaun Jornalista

Iha biban ne’e, parte rua mós kobre koperasaun ba oin ne’ebé foku ba:

Patrimóniu Edifikadu: Konservasaun ba fatin istóriu sira ne’ebé sai parte ba istória partillada entre nasaun rua.

Formasaun Jornalista: Hametin knaar Centru de Língua para Jornalistas (CLJ) hodi dezenvolve kbiit lian nian ba profisionál komunikasaun sira iha Timor-Leste.

Embaixadór Portugal mós aproveita oportunidade ne’e hodi konvida Ministru MJDAK atu vizita Sentru Kultura Portugués hodi haree rasik rekursu biblioteka no instrumentu edukativu sira ne’ebé nakloke ba joven no estudante timoroan sira.

Sorumutu ne’e termina ho kompromisu ida ne’ebé metin husi parte rua hodi serbisu "liman-ba-liman" nu’udar nasaun irmaun hodi promove dezenvolvimentu kulturál no edukativu iha Timor-Leste.

#MídiaMJDAK