Iha Postu Administrativu Matebian, Munisípiu Baucau, Xefe Gabinete MJDAK, Sr. Egas Barros Guterres Godinho, ofisialmente loke abertura ba modalidade Futsal no Voleiból iha loron 29 Abríl. MJDAK aloka orsamentu hamutuk USD $2.700 hodi fásilita kompetisaun ne’e, ne’ebé organiza husi lideransa lokál sira hodi komemora Restaurasaun Independénsia ba dala-24.
Sr. Egas Godinho hato’o apresiasaun ba vontade Xefe Suku sira iha Matebian ne’ebé sakrifika an hodi submete proposta to’o Dili. "Inisiativa hanesan ne’e mak MJDAK presiza hodi harii estabilidade, paz, no unidade liuhusi desportu iha ita-nia komunidade," tenik Xefe Gabinete.
La’ós de’it iha Matebian, espírito 20 de Maio mós habelar ona ba munisípiu sira seluk:
Zumalai (Covalima): Iha loron 01 Maiu, Xefe Gabinete mós ofisializa abertura ho apoiu USD $3.500 ba modalidade haat: Futeból, Voleiból, Maratona, no Hana Kalik.
Balibo (Bobonaro): Iha loron 02 Maiu, Reprezentante MJDAK, Sr. Jose Antonio Monteiro, loke abertura ba jogu komunitáriu iha Balibo, hodi konvida foin-sa’e sira atu joga ho disiplina no fuan boot.
Programa Desportu Komunitáriu 2026 ne’e hahú ona husi Postu Administrativu Ossu nu’udar "Odamatan" iha fulan-Abríl liubá. MJDAK nia vizaun mak atu kobre Postu Administrativu hamutuk 40 iha territóriu laran tomak iha tinan ne’e.
Husi abertura hirak ne’ebé hala’o ona, MJDAK la’ós de’it fó apoiu finanseiru, maibé foka mós ba dezenvolvimentu talentu husi baze no edukasaun mentalidade positivu ba foin-sa’e sira. MJDAK mensiona katak iha munisípiu Baucau rasik, kuaze 50% ona husi postu sira mak simu ona apoiu hodi hala’o sira-nia atividade desportiva.
Governu liuhusi MJDAK hein katak liuhusi desportu, foin-sa’e sira bele sai nu’udar "Rin" ba nasaun ne’ebé promove nafatin dame no amizade.
MídiaMJDAK
29 - 04 - 2026
fahe ba facebook
MINISTÉRIO DA JUVENTUDE, DESPORTU, ARTE E CULTURA
SECRÉTARIO ESTADO ARTE E CULTURA
