DÍLI, 22 Marsu 2026– Sua Exelénsia Primeiru-Ministru, Kay Rala Xanana Gusmão, akompaña husi Ministru Juventude, Desportu, Arte no Kultura (MJDAK), Nelyo Isaac Sarmento, ofisialmente enserra Liga Futebol Femeninu Timor-Leste (LFFTL) époka 2025/2026 iha Kampu FFTL, Díli, iha domingu ne’e.

Iha partida finál ne’ebé determina klasifikasaun ikus, klube S’AMUSER FC konsagra an nu’udar kampiaun ho totál pontu 45, hafoin hasoru AD. SLB Laulara ho rezultadu impata 0-0. Maske la iha golu durante tempu regulamentár, S’AMUSER FC hatudu konsisténsia no dezempeñu estável durante époka tomak, ne’ebé garante sira-nia pozisaun iha leten tabela klasifikasaun.

Prezensa husi lideransa nasionál sira iha eventu ne’e reforsa kompromisu Governu Konstitusionál IX hodi promove dezenvolvimentu desportu nasionál, liuliu hodi hametin partisipasaun no igualdade jéneru iha futeból feto.

Iha serimónia entrega troféu, Primeiru-Ministru hato’o parabéns ba ekipa kampiaun no mós klube sira hotu ne’ebé partisipa iha kompetisaun ne’e, ne’ebé envolve klube sanulu (10) no hala’o durante partida 90 hahú husi fulan Outubru 2025.

Ministru Nelyo Isaac Sarmento hato’o agradesimentu ba Primeiru-Ministru ba ninia prezensa no apoiu, ne’ebé konsidera importante hodi fó motivasaun ba atleta feto sira. “Prezensa Sua Exelénsia Primeiru-Ministru nian fó inspirasaun ba juventude feto sira hodi kontinua dezenvolve sira-nia talentu iha área desportu,” dehan Ministru.

Liga Futebol Femeninu époka 2025/2026 termina ho susesu, reflete progresu signifikativu iha dezenvolvimentu futeból feto iha Timor-Leste, ho perspetiva ne’ebé pozitivu ba futuru.

#MídiaMJDAK