Dili, 02 Marsu 2026 - Ministru Juventude,Desportu, Arte no Kultura (MJDAK), Sua Exelénsia Nelyo Isaac Sarmento akompaña husi Sua Exelénsia Sekretáriu Estadu Arte no Kultura (SEAK), Jorge Soares Cristovão, husu ba kargu xefia,diretores nasionais no funsionáriu sira hotu atu hatudu disiplina ezekusaun no perfórmansia durante atividade Isar Bandeira inisiu fulan Marsu. Atividade ne’e realiza iha resintu MJDAK Lecidere,Dili.

Iha nia intervensaun, Ministru Nelyo Isaac Sarmento salienta katak disiplina mak baze fundamentál ba formasaun karakter funsionáriu públiku hodi serví Estadu ho profisionalizmu no preparadu atu enfrenta prosesu desentralizasaun poder lokál.

“Disiplina ezekusaun no perfórmansia mak elementu importante atu garante kumprimentu ba regra no orientasaun institusionál. Disiplina fo kapasidade no kredibilidade ba atividade hotu ne’ebé ita halo, no ajuda forma ita nia karakter atu serví Estadu,” dehan Ministru.

Ministru mos hatete katak Estadu kontinua halo reforma funsaun públika, ne’ebé sei lori ba implementasaun desentralizasaun poder lokál. Tuir nia, munisipiu sira ne’ebé iha rekursu no kapasidade sufisiente sei bele simu delegasaun kompeténsia atu ezekuta servisu Estadu nian ho independente.

Nelyo Isaac Sarmento mos apela ba funsionáriu joven sira atu aproveita oportunidade hodi aumenta produtividade no dezenvolve disiplina pesoál, atu bele kontribui ho efisiénsia ba dezenvolvimentu nasaun. Nia subliña importánsia proatividade, loialdade ba Estadu no orientasaun ba interese nasional.

Partisipa iha atividade Isar Bandeira fulan ida ne’e mak Diretór Jerál na’in haat, Xefi Gabinete na’in rua, diretores nasionais, kargu xefia no funsionáriu sira hotu iha MJDAK.

#MídiaMJDAK