Dili, 02 Fevereiru 2026 – Ministru Juventude, Desportu, Arte no Kultura (MJDAK), Nelyo Isaac Sarmento, husu ba funsionáriu hotu atu hatais roupa ho dezenu tais kada loron Segunda. Lia-menon ne’e hato’o iha serimónia isar Bandeira fulan Fevereiru nian, iha Lecidere, Dili.

Tuir Ministru Nelyo Isaac, Governu hasai ona rezolusaun ida hodi asegura tais nu’udar património Estadu nian. Tan ne’e, instituisaun hotu tenke hatais tais hodi labele lakon.

“Ha’u kontente tebes tanba imi hotu hatais tais. Ida-ne’e la’ós de’it ba isar bandeira, maibé tenke kontinua kada Segunda,” dehan Nelyo Isaac.

Ministru esplika katak iha buat rua ne’ebé importante:

·       Dahuluk: Atu fó kbiit ba inan-aman sira ne’ebé soru tais, liuliu grupu sira ne’ebé Sekretáriu Estadu Arte no Kultura (SEAK) dezenvolve hela.

·       Daruak: Atu dudu empreza kík sira ne’ebé fa’an tais hodi moris di’ak liu tan.

Nelyo Isaac hatutan katak, hodi hatais tais, ita kuida hela património Estadu nian husi agora ba jerasaun foun sira.

Serimónia ne’e hetan partisipasaun husi Sekretáriu Estadu Arte no Kultura, Jorge Soares Cristovão, kargu xefia sira, no funsionáriu hotu husi Munisípiu to’o Nasionál.

#MídiaMJDAK