DILI, 05 JANEIRU 2026 – Isar bandeira nasionál dahuluk iha tinan 2026 iha Ministériu Juventude, Desportu, Arte no Kultura (MJDAK) la’ós de’it serimónia rutina ida, maibé sai hanesan mumentu reflesaun no afirma identidade nasionál. Sua Exelénsia Ministru Nelyo Isaac Sarmento (NIS), lori mensajen naroman liuhusi filozofia moris nian, hodi hamutuk ho apelu maka’as ba valorizasaun Tais iha instituisaun laran.

Lideransa hanesan "Lilin" no Oportunidade hanesan "Ai-tahan"

Iha ninia diskursu ne’ebé nakonu ho kbiit inspiratívu, Ministru NIS uza metáfora naturál hodi fó lia-mahon ba kargu xefia sira. Nia enfatiza katak sai xefe mak sai hanesan "lilin" ne’ebé prontu oferese-aan hodi fó naroman ba ema seluk, maske nia rasik tenke nabeen mohu.

Nia mós dehan katak mudansa mak buat ne'ebé labele evita, hanesan "ai-tahan maran" ne’ebé monu la’ós tanba fraku, maibé hodi fó oportunidade ba ai-tahan foun sira atu moris no fo bokur ba rai no aihun ne'e rasik. "Ita oferese ita-nia pensamentu hodi alkansa objetivu instituisaun nian, maibé ita mós tenke fó fatin ba jerasaun foun sira atu espresa sira-nia intelektualidade," tenik Titulár MJDAK ne’e.

Aas hanesan Makikit, Foka hanesan Kumpas

Ba funsionáriu sira, Ministru NIS uza istória "Manu-Makikit" hodi hanorin kona-ba oinsá responde ba krítika no tentasaun iha servisu fatin. Nia apela ba funsionáriu sira atu la bele gasta tempu hodi hatán ba lia-beik no lia laek sira, maibé foka de'it hodi "semo aas" hanesan makikit, hodi husik de'it dezafiu sira monu mesak iha kraik.

Nia mós husu ba hotu-hotu atu sai hanesan "Kumpas (Kompas; Lian Melayu)" ne’ebé sempre hatudu dalan ba oin. "Kumpas nunka hatete o halo a’at ema iha kotuk, maibé kumpas hatudu dalan ba oin hodi kria perspetiva foun ba ita-nia futuru," subliña NIS.

Tais: Identidade no Sustentabilidade Ekonómika

Alende dezenvolvimentu kbiit internu, Ministru NIS mós foka ba asuntu Identidade Nasionál. Nia reforsa katak, bazeia ba rezolusaun Governu nian, funsionáriu hotu tenke uza Tais iha kada segunda primeiru fulan-fulan nian.

Polítika ne’e la’ós de’it kona-ba kestaun estetika ka "hatais furak", maibé ho intensaun polítika hodi ajuda ekonómia iha baze. Liuhusi uza Tais, MJDAK apoiu direta kbiit ekonómika ba sira ne’ebé ita koñese nu’udar inan ka Mestre Soru-Tais iha munisípiu sira.

"Uza Tais ne’e ita-nia traje nasionál. Ita valoriza ita-nia inan-aman sira-nia liman-fuan badaen. Ha’u agradese ba imi ne’ebé ohin hatais ona, no ha’u espera iha fulan oin ita bele hatudu identidade ida-ne’e ho furak liután," ramata Ministru NIS.

Serimónia ne’e ramata ho espíritu foun hosi funsionáriu sira, ne’ebé kompromete-aan atu integra filozofia kumpas nian iha sira-nia knaar loroloron hodi serbi Estadu ho laran-metin.

#MídiaMJDAK