DÍLI, 23 Marsu 2026 – Ministru Juventude, Desportu, Arte no Kultura (MJDAK), Sua Exelénsia, Nelyo Isaac Sarmento, akompaña husi Diretór Jerál Juventude, David Tomas de Deus, ofisialmente asina akordu parseria ho organizasaun sanulu resin-sia (19), iha Salaun Magna MJDAK, Lecidere, Díli.

Akordu parseria ida-ne’e nia objetivu atu fortalece kooperasaun entre MJDAK no parseiru sira hodi implementa programa sira tuir orientasaun Polítika Nasionál Juventude (PNJ), no promove dezenvolvimentu kapasidade joven sira iha Timor-Leste.

Iha ninia intervensaun, Ministru Nelyo Isaac Sarmento hatete katak sentru juventude no organizasaun sira tenke iha vizaun estratéjiku ba oin atu bele alkansa objetivu ne’ebé ministériu defini.

“Ami apresia parseria ne’ebé iha tiha ona durante tinan sira. Iha futuru, importante tebes atu sentru juventude no organizasaun sira klarifika sira-nia vizaun no kontribuisaun atu apoia implementasaun politika nasionál juventude,” dehan Ministru.

Nia mos hatutan katak dezenvolvimentu programa sira la’ós responsabilidade ministériu de’it, maibé presiza envolvimentu forte husi parseiru sira, liuliu iha área formasaun abilidade, dezenvolvimentu karakter no mudansa mentalidade joven sira, hodi bele sai independente no kapás atu kria oportunidade ba sira-nia an rasik.

Iha okaziaun ne’e, Ministru mos enkoraja sentru juventude no organizasaun sira atu aumenta koordenasaun ho autoridade munisipál sira, hodi asegura implementasaun programa ne’ebé liga ho área juventude, desportu, arte no kultura tuir orientasaun Governu Konstitusionál IX nian.

Atividade ne’e konta ho partisipasaun husi sentru juventude 13 no organizasaun sira, inklui UNETL, ADTL, ANJHN, ANCTL, APFTL no CNJTL.

Ho asinatura akordu parseria ida-ne’e, MJDAK reafirma ninia kompromisu atu servisu hamutuk ho parseiru sira hodi promove dezenvolvimentu juventude ne’ebé inkluzivu no sustentável iha Timor-Leste.

#MídiaMJDAK