COVALIMA, 11 Outubru 2025 – Atividade atletizmu iha eventu prestijiozu Fronteira Cup 2025 iha Covalima bele remata ona, maibé istória dedikasaun no susesu husi atleta lokál sira kontinua fó inspirasaun boot ba joven Timoroan sira.

Ministériu Juventude, Desportu, Arte no Kultura (MJDAK), liuhosi Diretór Nasionál Desportu Komunitáriu, Sr. Egas Freitas da Rosa, simu ho laran kontente rezultadu boot husi atleta Covalima na'in-rua ne'ebé hatudu perfománsia notável: Celcia Estefânia Ximenes: Manán Primeiru Lugar ba distánsia 5 Kilometru (Kategoria Feto). Roberto Carlos Moniz: Manán Primeiru Lugar ba distánsia 7 Kilometru (Kategoria Mane).

Dedikasaun nu'udar Xave Susesu nian

Atleta na'in-rua ne'e espresa sira-nia kontente no orgullu tanba konsege atinje rezultadu ne'ebé di'ak. Celcia Ximenes husu ba federasaun hodi tau matan ba sira-nia talentu:

"Ha'u sente kontente no orgullu loos. Ha'u husu ba Federasaun Atletizmu atu loke dalan ba ha'u-nia talentu bele ba oin!"

Nune'e mós ho Roberto Carlos Moniz, ne'ebé hato'o:

"Ha'u esforsu an iha tinan rua nia laran. Nu'udar joven Covalima oan, ha'u kontente tebes manán [títulu ne'e]."

Lia hirak ne'e hatudu duni kompromisu atleta sira-nian hodi dezenvolve sira-nia an liuhosi dedikasaun no treinamentu.

Seguransa nu'udar Prioridade

Kona-ba implementasaun, Komisaun Organizadora no MJDAK halo desizaun estratéjika hodi garante seguransa no saúde partisipante sira-nian.

Komisaun deside atu hatun distánsia halai ba 5km (feto) no 7km (mane), tanba distánsia ne'ebé do'ok no klima loron ne'ebé manas tebes iha Covalima. Desizaun ne'e garantia katak atleta hotu bele halai ho seguru no konklui sira-nia risku ho susesu.

MJDAK agradese ba partisipante hamutuk 111 (86 mane no 25 feto) husi munisípiu hotu ne'ebé hatudu espíritu fair play no hametin unidade liuhosi desportu. Ministériu komprometidu atu kontinua promove valór ne'e: "Hamutuk Ita Ida De'it, Unidus Nós Somos Um."

#MídiaMJDAK