DILI, 15 Abríl 2026– Diresaun Nasionál Asosiativizmu Juventude (DNAJ) aprezenta ona rezultadu avaliasaun téknika no pareser kona-ba proposta fundus operasionál husi Konsellu Nasionál Juventude Timor-Leste (CNJTL) ba tinan fiskál 2026. Aprezentasaun ne’e hato’o husi Diretór Nasionál DNAJ, Mario Tilman, ba Diretór Jerál Juventude (DJJ), David Tomas de Deus, ho objetivu hodi asegura katak proposta hotu kumpri padraun legál no tékniku ne’ebé estabelese ona.

Identifika Inkonsisténsia iha Proposta

Bazeia ba avaliasaun ne’ebé hala’o, DNAJ identifika katak proposta ne’ebé CNJTL submete sei iha inkonsisténsia balun ne’ebé kontráriu ho baze legál sira, liu-liu Termu de Referénsia (ToR) ne’ebé regula kualidade atividade.

Diretór Mario Tilman subliña katak kumprimentu ba padraun hirak ne’e krusiál tebes hodi garante katak organizasaun sira iha kapasidade institusionál hodi jere fundus Estadu nian ho efetivu, akontavél, no tuir matadalan Planu Asaun Nasionál Juventude (PANJ).

Pozisaun Rigorozu husi Diretór Jerál Juventude

Diretór Jerál Juventude, David Tomas de Deus, apresia tebes serbisu rigorozu ne’ebé DNAJ hala’o hodi halo filtrajen ba proposta sira-ne’ebé tama. Nia fó hanoin katak MJDAK sei la tolera proposta ne’ebé la’o de’it tuir "hakarak" maibé la kumpri rekezitus tékniku no legál.

“Ita-nia prinsípiu mak ne’e: wainhira organizasaun parseiru sira la la’o tuir ToR no Akordu Servisu Hamutuk (ASH) ne’ebé iha, Ministériu sei la fó apoiu finanseiru. Ita tenke bazeia ba regra hodi garante transparénsia no boa-governasaun,” dehan Diretór Jerál David Tomas de Deus.

Hakat Tuir Mai: Diskusaun ho CNJTL

Hafoin aprezentasaun pareser ne’e, MJDAK liuhusi DNAJ sei konvoka fali sorumutu ida ho lideransa CNJTL hodi hato’o rezultadu avaliasaun refere. Sorumutu ne’e atu kria komprensaun hamutuk no fó oportunidade ba CNJTL hodi halo ajustamentu ba sira-nia proposta, nune’e bele kumpri fali rekezitus hotu molok kontinua ba etapa ezekusaun nian.

Aleinde kestaun fundus, Diretór Jerál mós informa katak MJDAK prepara hela inisiativa "Municipality Youth Profile" hodi ajuda munisípiu sira halo planeamentu ne’ebé bazeia ba dadus reál kona-ba nesesidade foin-sa’e nian.

#MídiaMJDAK