DILI, 27 MARSU 2026 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, partisipa iha Serimónia Komemorasaun Aniversáriu Polísia Nasionál Timor-Leste (PNTL) ba dala-26, ne’ebé akompaña mós ho tomada de posse ba Komandu foun PNTL nian, iha resintu Palásiu Governu, Dili.

Iha serimónia solene ne’e, Sua Exelénsia Primeiru-Ministru, Kay Rala Xanana Gusmão, fó pose  ba Komandante-Jerál PNTL foun, Komisáriu Asistente Afonso dos Santos, no Segundu Komandante-Jerál PNTL, Komisária Asistente Natércia Eufrásia Soares Martins.

Iha ninia diskursu, Primeiru-Ministru Xanana Gusmão fó hanoin ba kórpu polisiál tomak katak kbiit instituisaun nian depende ba konfiansa povu nian.

"Imi ajente polísia hamutuk ho imi-nia komandante na’in-rua, ita tenke asegura estabilidade iha ita-nia rain. Povu tenke moris ho hakmatek no sente seguru tanba hatene katak iha polísia ne’ebé prontu atu proteje no ajuda sira," dehan Xefe Governu.

Aleinde ne’e, Primeiru-Ministru mós hato’o parabéns ba PNTL ba tinan 26 nia laran. Nia fó rekoñesimentu ba dedikasaun husi komandante no membru sira hotu ne’ebé harii ona instituisaun ne’e husi inísiu to’o ohin loron, hodi asegura dame ne’ebé povu goza hela.

Prezensa Ministru MJDAK iha eventu ne’e hatudu koperasaun metin entre MJDAK ho instituisaun seguransa, liuliu iha kordenasaun hodi asegura ambiente ne’ebé hakmatek ba dezenvolvimentu juventude, desportu, no kultura iha Timor-Leste.

Serimónia ne’e mós konta ho partisipasaun husi membru Governu sira seluk, kórpu diplomátiku, no konvidandu  sira.

#MídiaMJDAK