ERMERA, 30 Agostu 2025 – Ministériu Juventude, Desportu, Arte no Kultura (MJDAK), liuhosi Diretór Nasionál Patrimóniu Logístika no Infraestrutura (DNPLI), Sr. Abel de Jesus Andrade, reprezenta S.E. Ministru Nelyo Isaac Sarmento, hala'o serimónia abertura ofisiál ba "Ermera Futsal Cup 2025" iha Kampu Futsal Ermera.

Atividade ne’e, ne’ebé atrai partisipasaun másivu, ho tema: "Promove Pás no Amizade iha Munisípiu Ermera," hodi selebra loron istóriku nasionál Konsulta Populár 30 Agostu.

Omenajen ba Sakrifísiu no Valór Pátriu

Iha nia intervensaun, Diretór DNPLI, Sr. Abel de Jesus Andrade, subliña katak loron 30 Agostu nu'udar loron istóriku ne'ebé merese atu selebra no hanoin hikas.

"Loron ida ne'e hanesan oportunidade úniku ba Timor-Leste atu hetan Ukun Rasik An liuhusi Konsulta Populár iha tinan 1999," nia dehan.

Nia apela atu la bele haluha hato'o agradesimentu boot ba Erói sira hotu ne'ebé fó sira-nia sakrifísiu boot hodi funu ba ukun rasik an, atu nune'e povu bele moris livre, unidu, soberanu, no independente.

Desportu nu'udar Meiu ba Dezenvolvimentu Juventude

Diretór Abel de Jesus Andrade esplika katak Governu, liuhusi MJDAK, iha responsabilidade bo'ot atu dezenvolve juventude liuhusi edukasaun, saúde, partisipasaun siviál, empregu, no, liu-liu, kombate violénsia no krime.

Nia hatutan katak Desportu nu'udar meiu ida ne'ebé di'ak tebes atu: Hadi'a jovens nia karáter, Hametinkooperasaun, amizade, no espíritu ekipa, Hadi'a kondisaun fíziku no dezenvolve sira-nia lideransa.

"Atividade fízika ne'e hanesan fator importante ida ba kualidade moris ema hotu-hotu nian, hodi asegura ita-nia produtividade ne'ebé boot liu ho sensasaun bein-estár," Diretór ne'e subliña.

Komitmentu Governu no Partisipasaun Regional

Governu, liuhusi MJDAK, sei kontinua apoia atividade desportu liuhusi finansiamentu, promosaun, no dezenvolvimentu rekursu umanu. Nia apresia tebes inisiativa husi jovens sira ne'ebé organiza eventu hanesan ne'e.

Husi parte Munisípiu Ermera, Sekretáriu Finansa Asuntu Administrativu Munisípiu, Sr. José da Costa Gomes, apresia tebes kontribuisaun joven sira liuhusi desportu. Nia hatete katak manan ka lakon la'ós problema, maibé ida-ne'e oportunidade atu hadi'a an hodi sai vensedór iha futuru.

Ermera Futsal Cup 2025 partisipa husi Munisípiu haat: Dili, Aileu, Liquiçá, no Manatutu, ho klube totál 47 (klube 40 mane no klube 7 feto).

Iha jogu abertura, ekipa mane FC Losal manan FC Bugaca ho skor 7-3, no ekipa feto FC Surik manan FC Somos Uno ho skor 2-0.

#MídiaMJDAK