Dili, 02 Marsu 2026 — Sekretáriu Estadu ba Arte no Kultura (SEAK), Sua Exelénsia Jorge Soares Cristovão, ohin hala’o enkontru ho ekipa husi International Trade Centre (ITC) hodi diskute implementasaun Kódigu Direitu Autor no Direitu Konexu iha setór kriatividade no kultura iha Timor-Leste.

Enkontru ne’e iha objetivu atu esplora potensial kolaborasaun no asisténsia téknika, troka informasaun kona-ba esforsu sira ne’ebé dadaun ne’e lao hela, no asegura koordenasaun institusionál ne’ebé efetivu hodi avansa inisiativa estratéjika ida ne’e ba dezenvolvimentu setór kriatividade no kultura nasional.

Durante enkontru, ekipa ITC halo apreséntasaun kona-ba atividade sira ne’ebé implementa hela iha Timor-Leste liuhosi projetu finansiadu husi União Europeia ho títulu “Supporting to Regional Integration and Trade”. Projetu ne’e fó apoiu ba integrasaun rejional no dezenvolvimentu komérsiu, inklui fortalecimentu kapasidade institusionál iha área relevante sira.

Komponente importante ida iha projetu refere mak apoiu ba estabelesimentu no fortalecimentu sistema propriedade intelektual (IP) iha Timor-Leste, inklui apoiu ba implementasaun Kódigu Direitu Autor no Direitu Konexu. Inisiativa ne’e konsidera hanesan parte husi kompromisu nasional ba prosesu adezaun ba Organização Mundial do Comércio (OMK) no integrasaun iha ASEAN.

Implementasaun sistema direitu autor ne’ebé forte espera atu proteje direitu kria-dores no artistak sira, promove inovasaun no kriatividade, no kontribui ba dezenvolvimentu sustentável setór kultura no ekonomia kriativa iha país.

#MídiaMJDAK