DILI, 08 ABRIL 2026 – Konsellu Ministrus (KM) hala’o sorumutu ordináriu iha Palásiu Governu, Dili, hodi delibera kestaun estratéjika balu ne’ebé foka ba dezenvolvimentu infraestrutura, promosaun investimentu, estabilidade administrativa, no kooperasaun internasionál.

Sentru Konvensaun Dili: Preparasaun ba Prezidénsia ASEAN 2029

Konsellu Ministrus aprova ona Projetu Arkitetóniku ba Sentru Konvensaun Dili foun. Proposta ne’e aprezenta husi Vise-Primeiru-Ministru no Ministru Koordenadór Asuntus Ekonómikus, Francisco Kalbuadi Lay.

Sentru konvensaun ne’e sei harii iha área Portu Tuan, Baía Díli, ho objetivu prinsipál atu sai fatin ba reuniaun boot sira, inklui Simeira Xefe Estadu no Xefe Governu sira nian durante Timor-Leste nia Prezidénsia ba ASEAN iha tinan 2029. Edifísiu ne’e sei inklui: Sala konferénsia, auditóriu, no pavillaun ba espozisaun. Área lazer, turizmu, kais ba pasiu, akuáriu, no sentru komérsiu.

Nomeasaun foun iha TradeInvest Timor-Leste

Governu aprova mós Rezolusaun hodi nomeia Duílio Marino Gusmão Araújo da Silva nu’udar Diretór Ezekutivu foun ba Ajénsia Promosaun Investimentu no Esportasaun (TradeInvest Timor-Leste, IP).

Nomeasaun ne’e bazeia ba nia kompeténsia téknika no esperiénsia naruk ne’ebé hatudu ona iha instituisaun ne’e dezde tinan 2019, ho mandatu ba tinan tolu iha rejime eskluzividade.

Estabilidade Divizaun Administrativa no Eleisaun 2027

Ho proposta husi Ministru Administrasaun Estatál, Tomás do Rosário Cabral, Governu aprova orientasaun polítika foun kona-ba territóriu. Atu asegura estabilidade ba Eleisaun Prezidensiál 2027, Governu determina: La kria Postu Administrativu no Suku foun. Obrigatórimente prienxe "Fixa Família" iha aldeia ida-idak hodi reforsa identifikasaun komunidade. Garante kontinuidade prestasaun servisu públiku ba populasaun.

Kooperasaun ho KOICA: Ambiente no Seguransa Alimentár

Iha sorumutu ne’e mós, liuhusi aprezentasaun husi Vise-Ministra Finansas, Regina de Jesus, KM autoriza asinatura akordu subvensaun rua ho Ajénsia Kooperasaun Internasionál Korea (KOICA): Restaurasaun Florestál (US$ 6 Millaun): Foka ba munisípiu Baukau no Manatutu (2026–2033) hodi moderniza viveiru nasionál no programa reflorestasaun. Nutrisaun no Seguransa Alimentár (US$ 7,2 Millaun): Sei implementa iha Baukau, Bobonaru, Manufahi, no Vikeke (2026–2030) hodi hadi’a infraestrutura dapur eskolár, fortifikasaun ai-han, no apoiu ba produsaun agríkola lokál.

Sorumutu ne’e konta mós ho partisipasaun husi Ministru Juventude, Desportu, Arte no Kultura (MJDAK), Nelyo Isaac Sarmento, hamutuk ho membru Governu sira seluk.

#MídiaMJDAK