DÍLI, 17 ABRIL 2026 (MEDIA SEAK) – Sekretáriu Estadu ba Arte no Kultura (SEAK), Sua Exelénsia Jorge Soares Cristóvão, asina Memorandum de Entendimentu (MoU) ho parseiru nasionál rua, Timor-AID no Fundasaun Alola, ho objetivu prinsipál atu promove no dezenvolve Asosiasaun Rede Soru-na’in sira iha territóriu nasionál.

Sekretáriu Estadu Jorge Soares Cristóvão hateten katak kooperasaun ne'e nu'udar pasu estratéjiku ida husi Governu liuhusi SEAK atu fó apoiu ne'ebé sustentável ba artezanatu timoroan, liuliu ba grupu feto soru-na’in sira.

"Asinatura MoU ne’e reprezenta konpromisu Governu nian hodi hametin fali ita-nia identidade kulturál liuhusi Tais, no mós sai hanesan meius ida hodi hasae empoderamentu ekonómiku ba soru-na’in sira, liuliu sira ne’ebé hela iha área rurál," dehan SEAK iha ninia intervensaun.

Serimónia asinatura ne'ebé hala'o iha Edifísiu SEAK, Praia dos Coqueiros, Dili, konta mós ho partisipasaun husi lideransa másimu husi parseiru na'in rua. Ofisialmente, dokumentu ne'e asina husi CEO Timor-AID, Sra. Maria do Céu Lopes da Silva, no Diretora Ezekutiva Fundasaun Alola, Sra. Maria Imaculada Guterres.

Parseria ne'e sei foka ba kria rede servisu ne'ebé organizadu, nune'e produtu Tais husi área rurál bele hetan asesu di'ak liután ba merkadu lokál no internasionál, hodi garante katak kbiit ekonómika soru-na’in sira nian aumenta ba beibeik.

Atividade ne'e remata ho susesu no sai nu'udar sasin ba hametin servisu hamutuk entre Governu no sosiedade sivíl hodi salva-guarda patrimóniu kulturál imateriál Timor-Leste nian.