Sorumutu kordenasaun ne’ebé lidera husi Diretór Nasionál DNAJ, Sr. Mario Tilman, foka ba revizaun kapasitasaun organizasaun juventude nian, ne’ebé sai kestaun prioritáriu iha Planu Asaun Anuál (PAA) 2026. Alokasaun orsamentu liuhusi fundus Transferénsia Públika (TP) prepara ona hodi dudu programa sira ne’ebé inkluzivu ba juventude iha territóriu laran tomak.
Iha biban ne'e, Diretór Mario Tilman introdus Termu Referénsia (ToR) foun ba atividade sira ne’ebé planeadu ona hodi hala'o iha Trimestre II (Q2). "Ita-nia meta mak atu asegura katak foin-sa’e sira la’ós de’it partisipa, maibé sira mós hetan benefísiu loloos husi formasaun regulár lideransa nian. ToR ne’e sei sai xave hodi asegura implementasaun ne’ebé efisiente, efikás, no responsavel," dehan Diretór DNAJ ne'e.
Sorumutu ne’e mós sai nu’udar parte husi mekanizmu Monitorizasaun no Avaliasaun (MONEV) hodi analiza progresu servisu APFTL nian. Tuir kalendarizasaun DNAJ nian, iha fulan Abríl ba oin, ekipa monitorizasaun ne’ebé kordena husi Sr. Gil dos Santos Alves sei komesa tun ba fatin atividade sira hodi asegura katak dezenvolvimentu Parlamentu Foinsa’e (PFN) la’ó tuir planu ne’ebé aprovadu ona.
Prezidente APFTL, Sra. Benvinda Gusmão Alves, hamutuk ho Korpu Reuniaun Jerál, manifesta sira-nia prontidaun hodi dudu dinamizmu PFN nian. Harmonizasaun ne’e mós sei inklui prosesu relatóriu narativu no ezekusaun ne’ebé sei integra iha sistema SIPMARE, hodi garante transparénsia ba atividade hotu-hotu.
Sorumutu ne'e partisipa mós husi Xefe Seksaun Parlamentu Foinsa’e, Sra. Cesaltina Ferreira da Silva Camacho, ne'ebé sei kordena diretamente kestaun tékniku kobertura no lójika lideransa foin-sa'e nian iha dileran.
MJDAK reafirma katak investimentu iha Parlamentu Foinsa'e mak investimentu ba futuru Estadu nian, hodi kria lideransa foun ne’ebé iha integridade no dedikasaun ba dezenvolvimentu nasionál.
#Mídia MJDAK
MídiaMJDAK
19 - 03 - 2026
fahe ba facebook
MINISTÉRIO DA JUVENTUDE, DESPORTU, ARTE E CULTURA
SECRÉTARIO ESTADO ARTE E CULTURA
