ERMERA, 21 Abríl 2026 (GCI/MJDAC) – Atu asegura transparénsia no dezenvolvimentu kapasidade foinsa’e sira nian, Jestór Sentru Juventude Ermera, Abrão de Deus, esklarese programa formasaun oioin ne’ebé hala’o ona iha tinan ne’e nia laran. Liuhusi kobertura ne’ebé hala’o husi ekipa GCI MJDAC, Jestór ne’e subliña katak foku prinsipál iha trimestre dahuluk mak hametin kualidade báziku ba joven na’in 74 iha área lian Inglés, Komputadór, no Edukasaun Sívika.

Espansaun Formasaun no Parseira Estratéjika

Entra ba Segundu Trimestre (Q2), Sentru Juventude Ermera hahú ona simu rejistrasaun foun ba kurzu Lian Inglés no Komputadór. Alende ne’e, sentru mós dezenvolve hela programa Life Skill Basic Education ne’ebé akumula ona benefisiáriu na’in 38, liuhusi kooperasaun ho Fundasaun Laburmunda Samaritano iha Lauala.

Hodi hametin estabilidade sosiál, sentru ne'e planeia mós programa Peace Building (Hari’i Dame) ne’ebé foka ba prevensaun konflitu entre arte marsiais no rituál, liuhusi envolve autoridade lokál sira hanesan Xefe Suku no aldeia. Ba implementasaun programa sira-ne’e, sentru buka alternativu finansiamentu husi Gabinete Sosiedade Sivíl no parseiru dezenvolvimentu sira hanesan UNFPA, UNDP, no YES Project.

Adaptasaun ba Merkadu Traballu

Abrão de Deus subliña importánsia hodi muda perspetiva foinsa’e sira- nian hodi kumpri ezijénsia merkadu traballu nian. Atualmente, formasaun Lian Inglés sai nu’udar preferénsia boot liu tanba joven barak prepara aan hodi ba servisu iha rai-li’ur, hanesan programa PALM iha Austrália no mós ba Koreia do Sul.

"Ami mós fó formasaun Character Counseling, ne'ebé inklui tékniku hakerek CV no preparasaun ba aplikasaun servisu iha instituisaun Estadu sira. Ami-nia foku mak kumpri koridór Polítika Nasionál Juventude nian, liuliu ba joven idade tinan 15 to’o 24," dehan Jestór Abrão.

Dezafiu Fasilidade no Kapasitasaun Rekursu Umanu

Maski programa sira la’o ho progresivu, sentru ne’e mós enfrenta dezafiu relasionadu ho ekipamentu no treinadór. Sentru hahú ona aloka orsamentu hodi sosa komputadór foun hodi aumenta kualidade aprendizajen, konsidera katak loron ida aula hala’o dala haat hodi kobre formandu sira ho másimu.

Iha parte seluk, Abrão de Deus hato’o rekomendasaun ba MJDAC hodi fó formasaun kapasitasaun ba jestór sira, liuliu iha área finansas, jestaun lideransa, no administrasaun organizasaun nian. Kapasitasaun ne’e importante tebes hodi asegura katak Sentru Juventude bele jere atividade hamutuk 12 ne’ebé planeia ona ba tinan 2026 ne’e ho efisiente no sustentável.