Dili, 07 Novembru 2025 – Ministériu Juventude, Desportu, Arte no Kultura (MJDAK), liuhosi Xefe Gabinete Sr. Egas Barros Guteres Godinho, hamutuk ho Ministériu Saúde (MS) no Komite 12 Novembru, ohin realiza atividade Konsulta Masál Saúde iha Resintu MJDAK, Lecidere.

Atividade ne'e nu'udar parte hosi komemorasaun Masakre Santa Cruz ba dala XXXIV no fó fokus ba tema: “Ha’u Ema Timor Orgullu ho Ha’u Nia Nasaun.”

Reafirmasaun Orgullu no Apoiu ba Juventude

Sr. Egas Barros hatete katak Konsulta Masál ne'e importante tebes tanba oferese kondisaun di'ak ba jerasaun atuál atu komemora loron krítiku Masakre Santa Cruz. Nia husu ba joven Timor-Oan tomak atu mantein sentidu orgullu no kontinua luta mehi Eroi sira-nian hodi harii Pás no Estabilidade.

"Ami apresia ba inisiativa hosi médiku no espesialista sira ne’ebé mai partilla domin, hodi halo tratamentu ba maluk ne’ebé presiza ita hotu nia tulun," hatete Xefe Gabinete.

Sr. Egas Barros mós informa kona-ba programa apoiu ba inisiativa juventude nian:

·       MJDAK apoia ona Grupu Juventude Kreativu ualu (8).

·       Kada grupu simu apoiu US$ 2,500.00 hodi enkoraja talenta ne’ebé subar hela iha Suku no Aldeia sira.

Saúde Besik ba Komunidade

Reprezentante MS, Diretór Jerál Polítika, Kooperasaun, Parseria no Dezenvolvimentu, Sr. Florindo Gonzaga Pinto, esplika katak objetivu Konsulta Masál ne’e mak atu lori saúde besik ba komunidade sira no aselera indikadór saúde nian.

Sr. Florindo Gonzaga nota katak liuhosi integrasaun atividade, MS konsege alkansa to’o 5.4 porsentu iha tinan 2023-2025, hodi hatudu susesu iha lori serbisu saúde ba iha baze.

Partisipasaun Institusionál

Kolaborasaun ne’e involve Pesoál hosi Diresaun Jerál no Nasionál MJDAK, Médiku Espesialista hosi Hospitál Nasionál Guido Valadares (HNGV), Servisu Nasionál Ambulânsia, Servisu Saúde Munisípiu Dili, Komite 12 Novembru, Estudante Universitáriu, no komunidade sobrevivente Masakre Santa Cruz nian.

Atividade ne’e nu’udar ezemplu forte kona-ba serbisu integradu entre Ministériu rua (MJDAK no MS) hodi fó valor ba istória no serbí povu.

#MídiaMJDAK