DILI, 17 Abríl 2026 (GCI/MJDAC) – Diretór Jerál Desportu husi Ministériu Juventude, Desportu, Arte no Kultura (MJDAK), João M. Rodrigues, reprezenta Ministru MJDAK, ofisialmente loke Kampionatu Nasionál Karaté-Do Seniór ba dala VII, "Taça Xanana Cup 2026". Atividade desportiva ne’e hala’o iha Jináziu Desportu Dili (GDD), sesta-feira ne’e.

Serimónia abertura ne’e akompaña mós husi Prezidente Federasaun Karaté-Do Timor-Leste (FEKATIL), Filomeno Soares de Araújo, no prezidente federasaun sira seluk.

Prioridade 2026 no Preparasaun ba SEA Games 2027

Iha nia diskursu, Diretór Jerál João M. Rodrigues informa katak Governu liuhusi MJDAK foti ona desizaun estratéjika hodi hasa’e montante apoiu finanseiru ba modalidade Karaté iha tinan fiskál 2026.

"Karaté tama iha planu prioridade 2026. Tanba ne’e, apoiu finanseiru ne’ebé baibain purvolta de $20 to’o $30 mil, Governu hasa’e fali ba $70.000,00 (dolar rihun hitu-nulu). Investimentu ne’e hodi finansia atividade ba kategoria Juniór no Seniór, inklui halo selesaun ba atleta sira ne’ebé sei reprezenta Timor-Leste iha SEA Games Malaysia 2027," dehan Diretór Jerál ne’e.

Governu hakarak asegura katak selesaun nasionál iha tempu ne’ebé naruk no sufisiente hodi halo preparasaun fíziku no tékniku, nune’e bele kompeti ho kbiit másimu iha kintu internasionál.

Inkluzaun Munisípiu no Planu Mestre Desportu

Kampionatu ba dala VII ne’e hetan partisipasaun husi atleta hamutuk na’in 168 (kompostu husi feto no mane) ne’ebé reprezenta munisípiu 14 iha territóriu laran tomak. Envolvimentu husi munisípiu sira sai nu’udar sinál progresu ba dezentralizasaun desportu nian.

Diretór Jerál ne’e mós subliña katak MJDAK foku hela hodi eleva kualidade atleta no treinadór sira. "Ita tenke prepara ho másimu hodi hasa’e nível kualifikasaun. Agora daudaun, Governu dezenvolve hela 'Planu Mestre' ba dezenvolvimentu desportu nian ba periodu 2027-2030, ne’ebé sei sai baze ba progresu desportu nasionál iha futuru," nia haktuir.