DILI, 28 Abríl 2026 (GCI/MJDAK) – Ministériu Juventude, Desportu, Arte no Kultura (MJDAK), liuhusi Sekretaria Estadu Arte no Kultura (SEAK), konklui ona preparasaun téknika hotu hodi simu delegasaun husi nasaun membru sira ba XIV Reuniaun Ministru Kultura da Comunidade dos Países de Língua Portuguesa (CPLP), ne’ebé sei realiza iha Dili husi loron 4 to’o 5 Maiu 2026.

Realizasaun simeira ne’e sai momentum signifikativu tebes, tanba koinside mós ho selebrasaun Aniversáriu ba dala-30 fundasaun CPLP nian (17 Jullu 1996 - 2026). Okaziaun ne’e sai hanesan plataforma estratéjika hodi hametin liután lasu kooperasaun kulturál no diplomátika iha mundu luzofonia nian laran.

Konkluzaun Preparasaun Téknika

Ohin, loron 28 Abríl, Pontu Fokál sira hala’o ona enkontru finál liuhusi  videokonferénsia Zoom Meeting. Reuniaun ne’e foka ba sinkronizasaun ajenda finál ba loron rua simeira nian, hodi asegura katak aspetu lojístika no protokolár hotu prontu hodi simu Sua Exelénsia Ministru sira husi nasaun membru ualu seluk.

Estrutura Programa XIV Reuniaun

Bazeia ba ajenda ofisiál, simeira ne’e sei fahe ba etapa rua prinsipál:

Loron 4 Maiu: Reuniaun Pontu Fokál sira nian sei hala’o iha Salão MNEC, Dili. Fokus prinsipál mak atu halo balansu ba Plano Bienal 2024-2025, debate prioridade ba biéniu 2026-2027, no prepara dokumentu tékniku sira ba segmento ministerial.

Loron 5 Maiu: XIV Reuniaun Ministru Kultura nian sei hala’o iha Hotel Timor. Sessão pública de abertura sei konta ho intervensaun husi Sua Exelénsia Primeiru-Ministru, Kay Rala Xanana Gusmão, Ministru MJDAK, Nelyo Isaac Sarmento, no Sekretária Ezekutiva CPLP, Maria de Fátima Monteiro Jardim.

Momentu Istariku: Tranzisaun Prezidénsia

Momentu institusionál ne’ebé importante liu iha simeira ne’e mak pasajen Prezidénsia Reuniaun Ministru Kultura husi São Tomé e Príncipe ba Timor-Leste. Ho responsabilidade foun ne’e, Timor-Leste sei lidera setór kultura nian iha CPLP ho foku ba tema: "Salvaguarda Eransa Kulturál nu’udar Promosaun Identidade no Sidadania".

Enserramentu simeira ne’e sei selebra hamutuk ho Dia Mundial da Língua Portuguesa, ne’ebé sei inklui Sessão Solene, momentu kulturál, no jantár konfraternizasaun ba delegasaun hotu.